Ժամանակակից կրթական և սոցիալական գործընթացներում ծնողի դերը երեխայի զարգացման և սոցիալականացման մեջ դիտարկվում է որպես հիմնարար գործոն։ «Ուսում» դպրոցի նախաձեռնած «Գիտակից ծնողավարում» պլատֆորմը նպատակ ունի ներկայացնելու ծնողավարումը՝ որպես իրական և բազմաշերտ գործընթաց՝ հիմնված դրական ու կյանքից վերցված փորձառությունների, զարգացման հոգեբանության և հուզական կրթության սկզբունքների, համագործակցության և փոխօգնության մոտեցումների վրա։
Պլատֆորմը տեսական և գործնական փորձի փոխանակման միջավայր է ծնողների, մանկավարժների և հոգեբանների միջև։
Ծնողավարման հարթակի հիմնական նպատակներն են․
- ձևավորել ծնողական ինքնագիտակցություն և հուզական գրագիտություն,
- խթանել բաց և վստահ հաղորդակցություն ծնողի և երեխայի միջև,
- աջակցել ծնողներին՝ արդյունավետ հաղորդակցման և կոնֆլիկտների կառավարման հմտությունների զարգացման հարցում,
- նպաստել ծնող-երեխա փոխազդեցության դրական փորձի ընդլայնմանը և սոցիալական աջակցության ձևերի ընդլայնմանը։
Հարթակի բովանդակությունը ներառում է․
- կիրառական խորհուրդներ և արդյունավետ ռազմավարություններ երեխայի հետ փոխհարաբերությունների կառավարման համար,
- իրական ծնողական փորձառությունների վերլուծություններ՝ ընդգծելով ինչպես հաջողված, այնպես էլ ձախողված իրավիճակների լուծումները,
- հոգեբանական և մանկավարժական մեկնաբանություններ ծնողավարման առանցքային թեմաների շուրջ,
- խաղային և ստեղծագործ մեթոդների ներկայացում՝ միտված երեխայի հետաքրքրասիրության և ինքնարտահայտման զարգացմանը։
Հարթակի նախաձեռնող անձնակազմն ու աշխատանքային թիմը ներառում են վերոնշյալ խնդիրներին քաջածանոթ և ոլորտում ներգրավված այնպիսի անձանց, ինչպիսիք են՝ «Բվիկ» կրթական հիմնադրամի փորձագետ, «Գիտակից ծնողավարում» դասընթացի ղեկավար Անժելա Մանասյանը, «Դասավանդի՛ր, Հայաստան» կրթական հիմնադրամի առարկայական փորձագետ, մանկավարժ-մեթոդիստ Կարլեն Նազարյանը, Կլինիկական հոգեբանների հայկական ասոցիացիայի անդամ, World Vision միջազգային կառույցի հոգեբան, հոգեթերապևտ Հասմիկ Հարությունյանը, «Ուսում» դպրոցի մանկավարժներ Հասմիկ Նազարյանը, Աննա Մանասյանը, Մերի Պետրոսյան և Անի Գևորգյանը։
Հարթակի՝ «Առաջին դասարան։ Միասնական սկիզբ դեպի հաջողություն» թեմայով անդրանիկ հանդիպումը կներառի հետևյալ օրակարգը․
1. Տարիքային փուլերն ու առանձնահատկությունները։ Խաղահրապարակից դեպի աշակերտական սեղան։ Փափուկ ադապտացիա (բանախոս՝ Հ․ Հարությունյան)։
2. Կամակորության և վախերի պատճառներն ու հաղթահարման ուղիները (բանախոս՝ Մ․ Պետրոսյան)։
3. Ծնողավարման տեսակները։ Դրական ծնողավարում (բանախոսներ՝ Հ․ Նազարյան Հ., Կ․ Նազարյան)։
4. Դպրոցի ճիշտ ընտրություն։ Ծնող–ուսուցիչ արդյունավետ համագործակցությունը։ Ի՞նչ պետք է երեխան իմանա և կարողանա դպրոց ընդունվելիս (բանախոս՝ Մանասյան Ա.)։
Հավելենք նաև, որ հոկտեմբերի 25-ին՝ ժամը 11։00-ին կայանալիք սեմինարը հագեցած է լինելու գործնական աշխատանքներով և հետաքրքիր անակնկալներով։ Տևողությունը 90 րոպե է։ Ավարտին մասնակիցները կստանան մասնակցության հավաստագրեր։
Այստեղ դուք կգտնեք՝
-հստակ հնարներ և լուծումներ՝ ինչպես շփվել երեխայի հետ առանց սպառվելու,
-պատմություններ իրական ծնողներից՝ հաջողված ու ձախողված փորձի փոխանակում,
-առանցքային թեմաների շուրջ հոգեբանական և մանկավարժական դիտարկումներ,
-խաղային ու ստեղծագործ մոտեցումներ՝ ուսումնառությունն ավելի դյուրին, հետաքրքիր ու արդյունավետ դարձնելու համար և ավելին։
Բոլորիս կյանքում եղել են պահեր, երբ մենք որպես ծնողներ հայտնվել ենք դժվարին իրավիճակներում, ունեցել մեղքի զգացում. «Արդյո՞ք ճիշտ վարվեցի երեխայիս հետ»։
Այս հարթակը ստեղծվել է ոչ թե նախատելու կամ խրատելու, այլ ցույց տալու, որ մեզ միավորում է աշխարհի ամենագեղեցիկ սոցիալական դերերից մեկը՝ մայրությունն ու հայրությունը՝ սքանչելի զգացողություններով և միևնույն ժամանակ որոշակի դժվարություններով:
Ծնողավարման հարթակը գիտակից և դրական ծնողավարման անկյուն է, որտեղ ծնողավարումը չի ներկայացվում որպես կատարյալ սցենարով ֆիլմ, այլ որպես կենդանի, երբեմն խառը, բայց անսահման սիրով լի իրականություն։
«Ազատ չմտածել նշանակում է չմտածել»։
